Layihə çərçivəsində vətəndaş cəmiyyəti təşkilatları ilə Hökumət arasında DİM gündəliyinin icrası kontekstində dialoq və şəbəkələşmə üçün gender amilinin də nəzərə alındığı platforma yaradılmışdır. Həmçinin, vətəndaş cəmiyyəti təşkilatlarının DİM çərçivəsini daha yaxşı anlaması və DİM-lərin icrasında gender amilini nəzərə alan yanaşmaların tətbiqinə dair bacarıqlar artırılmış, vətəndaş cəmiyyəti təşkilatları tərəfindən icra edilən, gender məsələlərinə həssaslıqla yanaşılan DİM-lərlə bağlı layihələrə dəstək göstərmək üçün qrant proqramı həyata keçirilmişdir.

Konfransın açılışında Avropa İttifaqı Azərbaycan nümayəndəliyinin əməkdaşlıq şöbəsinin rəhbəri Simona Qatti, BMT-nin İnkişaf Proqramının Azərbaycan nümayəndəliyinin rəhbərinin müavini Çara Bist, İqtisadiyyat Nazirliyinin şöbə müdiri, Dayanıqlı İnkişaf üzrə Milli Əlaqələndirmə Şurasının katibi Hüseyn Hüseynov, Ailə, Qadın və Uşaq Problemləri üzrə Dövlət Komitəsinin Xarici əlaqələr və protokol xidməti şöbəsinin müdiri Səbinə Manafova və Hüquqi təminat şöbəsinin müdiri Taliyə İbrahimova çıxış etmişdir.