Dövlət Komitəsinin blogerlər arasında elan etdiyi müsabiqə davam edir
Cəmiyyətdə Azərbaycan ailə dəyərlərinin və gender bərabərliyinin təbliği, qadın və uşaq hüquqlarının müdafiəsi, gender əsaslı və məişət zorakılığı halları ilə mübarizənin aparılması məqsədilə sosial şəbəkələrin potensialından istifadə etməklə cəmiyyətin düzgün istiqamətləndirilməsi bu gün əhəmiyyət kəsb edən məsələlərdəndir.
Ailə, Qadın və Uşaq Problemləri üzrə Dövlət Komitəsi öz fəaliyyətində vətəndaş cəmiyyəti institutları, kütləvi informasiya vasitələri, eləcə də blogerlərlə əməkdaşlığa geniş yer ayırır.
Mövzunun əhəmiyyətini nəzərə alaraq, Komitə yanında İctimai şuranın təklifi ilə 23 may tarixindən etibarən sosial şəbəkə blogerləri arasında “Ailə dəyərləri, qadın və uşaq hüquqlarının təbliği üzrə ən fəal bloger” müsabiqəsi elan edilib.
Müsabiqənin məqsədi ailə dəyərlərinin, qadın və uşaq hüquqlarının sosial şəbəkələrdə təbliği, bu istiqamətdə ictimai fəal gənclər ilə əməkdaşlığın qurulması, zorakılıq, uşaq nikahları, insan alveri, narkomaniya və digər mənfi hallar ilə bağlı mübarizə istiqamətində edilən çağırışların geniş kütləyə çatdırılması, görülən işlərlə bağlı məlumatların cəmiyyətə düzgün ötürülməsi, ailədaxili münasibətlərin tənzimlənməsində yeni innovativ imkanların təşviqidir.
Müsabiqənin yekununda maraqlı, maarifləndirici, fərqli kontent hazırlamaq və yaymaq, cəmiyyətə təsir imkanları və insanların etimad göstəricisinə görə, eyni zamanda mövzu ilə bağlı paylaşım statistikaları üzrə fəaliyyətləri Münsiflər heyəti tərəfindən qiymətləndirilən ən aktiv blogerlər sertifikat və hədiyyələrlə mükafatlandırılacaqdır. (I yer: Kubok və Noutbuk, II və III yer: Planşet və sertifikat) Digər iştirakçılara həvəsləndirici sertifikatlar təqdim ediləcəkdir.
Müsabiqədə iştirak etmək arzusunda olan şəxslər 31 oktyabr 2022-ci il tarixinədək müraciət edə bilərlər. Bunun üçün əvvəlcə müsabiqənin əsasnaməsinə uyğun olaraq anket forması doldurmaqla qeyd olunan məsələlər ilə bağlı materiallar (hekayə statistikalarının ekran rəsmi və postların linki əlavə olunaraq) informasiya.aqupdk@scfwca.gov.az elektron ünvanına göndərilməlidir.
Müsabiqənin şərtləri barədə ətraflı məlumat üçün müsabiqənin əsasnaməsi ilə tanış ola bilərsiniz.