Ailə, Qadın və Uşaq Problemləri üzrə Dövlət Komitəsi Ədliyyə Nazirliyi Penitensiar Xidmətinin Tərbiyə Müəssisəsində olan uşaqların asudə vaxtlarının səmərəli təşkili, onların müəssisəni tərk etdikdən sonra cəmiyyətə inteqrasiyası istiqamətində mütəmadi olaraq tədbirlər keçirir.

Növbəti tədbir kimi 5 avqust 2022-ci il tarixində Ailə, Qadın və Uşaq Problemləri üzrə Dövlət Komitəsinin, Bakı şəhər Gənclər və İdman Baş İdarəsinin və Azərbaycan Badminton Federasiyasının birgə təşkilatçılığı ilə badminton turniri keçirilib.

Tədbir Tərbiyə Müəssisəsində olan yeniyetmələrin asudə vaxtlarının səmərəli təşkili, sağlam həyat tərzinin formalaşması və onların fiziki inkişafının təmin edilməsi məqsədi daşıyır.

Tədbirin rəsmi hissəsində Penitesiar Xidmətin Tərbiyə İşinin Təşkili İdarəsinin rəis müavini Yaşar Şəkiliyev, Ailə, Qadın və Uşaq Problemləri üzrə Dövlət Komitəsinin Uşaq problemləri şöbəsinin müdiri Cəmilə Bağırova, Bakı şəhər Gənclər və İdman İdarəsinin rəisi Raqif Abbasov, Azərbaycan Badminton Federasiyasının baş katibi Ramil Hacıyev çıxış edərək, turnir iştirakçılarına uğurlar arzu edib.

Yekunda qeyd olunan idman növü üzrə qaliblər təşkilatçılar tərəfindən diplomlarla mükafatlandırılıb. Eyni zamanda islah olunan uşaqların mütəmadi olaraq badminton idman növü ilə məşğul olmaları məqsədilə müxtəlif idman ləvazimatları və digər hədiyyələr təqdim edilib.

Qeyd edək ki, turnirdə iştirak edən uşaqların badminton üzrə bacarıqlarının artırılması məqsədilə 3-4 avqust tarixlərində Azərbaycan Badminton Federasiyasının müəllim heyəti tərəfindən təlimlər keçirilib