Türkiyə nümayəndə heyəti Fəxri xiyabanı, Şəhidlər xiyabanını və Türk Şəhidliyi" abidəsini ziyarət edib

19 iyul 2022

Paylaş:

Ailə, Qadın və Uşaq Problemləri üzrə Dövlət Komitəsinin sədri Bahar Muradovanın dəvəti əsasında 19-21 iyul 2022-ci il tarixlərində Azərbaycanda rəsmi səfərdə olan Türkiyə Respublikasının Ailə və Sosial Xidmətlər naziri Derya Yanıkın rəhbərlik etdiyi nümayəndə heyəti bu gün Fəxri xiyabanı, Şəhidlər xiyabanını və “Türk şəhidliyi” abidəsini ziyarət ediblər.

Dövlət Komitəsinin sədr müavini Sədaqət Qəhrəmanovanın da iştirakı ilə Fəxri xiyabana gələn Ailə və Sosial Xidmətlər Nazirliyinin nümayəndə heyəti Azərbaycan xalqının Ümummilli Lideri Heydər Əliyevin xatirəsini ehtiramla yad edərək, məzarı önünə əklil qoyublar. Sonra görkəmli oftalmoloq alim, akademik Zərifə Əliyevanın xatirəsinə ehtiram ifadə olunub, məzarı üzərinə tər çiçəklər düzülüb.

Şəhidlər xiyabanını ziyarət edən qonaqlar Azərbaycanın müstəqilliyi və ərazi bütövlüyü uğrunda şəhid olan qəhrəman Vətən övladlarının xatirəsini ehtiramla anaraq, məzarları önünə gül dəstələri düzüblər, "Əbədi məşəl” abidəsinin önünə əklil qoyublar. Həmçinin 1918-ci ildə Bakının azad edilməsi uğrunda döyüşlərdə həlak olmuş şəhid türk əsgərlərinin xatirəsinə ucaldılmış “Türk Şəhidliyi” abidəsi ziyarət edilərək, abidənin önünə əklil qoyulub.

Derya Yanık "Türk Şəhidliyi"nin abidəsinin xatirə kitabına ürək sözlərini yazıb. O qeyd edib ki, Azərbaycanda şəhid olan əsgərlərimiz Türkiyə və Azərbaycan arasındakı güclü qardaşlıq əlaqələrinin heç vaxt sarsılmayacağının sübutudur: “Bu gün Türkiyə-Azərbaycan qardaşlığı və dostluğu bütün dünyaya örnəkdir. Türkiyə həmişə qardaş Azərbaycanın yanında olacaq və hər mövzuda tərəddüdsüz dəstəyini göstərməyə davam edəcək”, - o bildirib.