2018-ci ilə ərzində Ailə, Qadın və Uşaq Problemləri üzrə Dövlət Komitəsi Səhiyyə Nazirliyi ilə birgə və Təhsil Nazirliyinin dəstəyi ilə Respublikamızın şəhər və rayonlarında orta ixtisas təhsilli müəssisələrində gənc və yeniyetmələr arasında sağlam həyat tərzinin təbliği, ziyanlı vərdişlərə (narkomaniya, alkoqolizm, tütün məlumatları) və QİŞS-ə qarşı mübarizənin gücləndirilməsi, talassemiyanın və qeyri-infeksion xəstəliklərin profilaktikası, reproduktiv sağlamlıq və ailə planlaşdırılması sahəsində gənclərin maarifləndirilməsi məqsədilə böyük uğurla tədbirlər həyata keçirilir.

Bu istiqamətdə keçirilən tədbirlərin davamı olaraq, 2019-cu il ərzində tədbirlərin keçirilməsi Bakı şəhərində və regionlarında yerləşən ilk peşə-ixtisas təhsil müəssisələrində planlaşdırılır. Növbəti tədbir 17 aprel 2019-cu il tarixində saat 11:00-da Emal Sənayesi üzrə Bakı Dövlət
Peşə Təhsil Mərkəzinin 17 nömrəli Bakı Peşə Liseyi  “Qohum evliliyi və talassemiya” mövzusunda liseyin qız və oğlan tələbələri üçün keçirilmişdir.

Tədbiri giriş sözü ilə açan liseyin təlim-tərbiyə işləri üzrə direktor müavini Əliyar Musayev tədbir iştirakçılarını salamlayaraq, tədbirin təşkilinə görə Ailə, Qadın və Uşaq Problemləri üzrə Dövlət Komitəsinə və Səhiyyə Nazirliyinə öz minnətdarlığını bildirib və tədbir keçirilməsinin əhəmiyyətini vurğuluyub. O, bu cür tədbirlərin mütəmadi olaraq keçirilməsinin vacibliyini vurğulamışdır.

Ailə, Qadın və Uşaq Problemləri üzrə Dövlət Komitəsinin Ailə Problemləri şöbəsinin müdiri Gülnarə Məmmədova tədbir iştirakçılarına Komitənin iş istiqaməti və fəaliyyəti haqqında məlumat verərək, rəsmi nikahın vacibliyindən, qeyri-rəsmi nikahdan yaranan fəsadlardan, nikah pozulmuş ailələrdə uşaqların yaşatdığı mənəvi sarsıntılardan, məişət zorakılığı və onun növlərindən bəhs etmişdir. O, həmçinin hal-hazırda ailələri narahat edən problemlərdən, nikahın pozulmasının nəticəsində yaranan problemlərdən, ailədə zorakılığın, erkən nikahın, qan qohumluğun, insan alverin, qeyir-rəsmi nikahın fəsadlarından söhbət aparmışdır.

Daha sonra çıxış edən Səhiyyə Nazirliyinin İctimai-səhiyyə İslahatlar Mərkəzinin həkim-metodisti, epidimioloq Lətafət Dadaşova “Qohum evlilikləri və talassemiya” mövzusunda çıxış edərək, talassemiya haqqında ümumi məlumat verərək, bu və bu kimi digər xəstəliklərin yaradılmasında genetikanın, qan qohumluğunun əsasında dyandığını deyib. Bütün bunları nəzərə alaraq nikahdan əvvəl tibbi müayinənin vacibliyini vurğulamışdır.

Sonra Komitə tərəfindən hazırlanmış maarifləndirmə materialları tədbir iştirakçılarına təqdim olunub və “Azərbaycan Ailəsi” Film Festivalına təqdim olunan milli-mənəvi, eləcə də ailə dəyərlərindən bəhs edən “Ailə bir ağacdır” qısametrajlı film, və cəmiyyətdə mövcud olan problemlərdən bəhs edən “Onlardan biri mənəm” adlı sosial çarx nümayiş edilib.