Azərbaycan BMT-nin CEDAW Komitəsinə altıncı dövri hesabatı hazırlayır

20 noyabr 2018

Paylaş:

BAKI, 20 noyabr 2018 - Azərbaycan Respublikasının Ailə, Qadın və Uşaq Problemləri üzrə Dövlət Komitəsi və BMT-nin Əhali Fondunun Azərbaycan nümayəndəliyi Qadınlara qarşı ayrı-seçkiliyin ləğvi üzrə Komitəyə (CEDAW) altıncı dövri hesabatın hazırlanması məqsədilə müvafiq hökumət qurumlarının gender məsələləri üzrə məsul nümayəndələrinə bacarıqların artırılmasına dair ikigünlük təlimə start veriblər.

Təlim iştirakçılarına CEDAW konvensiyasının həyata keçirilməsi üzrə hesabatın əsas hazırlanma qaydaları, proseslər və təlimatlar barəsində ətraflı məlumat verilib. Təlim beynəlxalq mütəxəssis Mary Shanti Dairiam tərəfindən təqdim edilib. Xanım Dairiam təlim iştirakçılarına CEDAW Komitəsinin hökumətlərin verdiyi dövri hesabatların və Əlavə Protokolların baxılması nəticəsində və diqər əsas öhdəliklər üzrə verdiyi məsləhətlər, müşahidələr və tələblər barəsində məlumat verib.

Açılış nitqi ilə çıxış edən Ailə, Qadın və Uşaq Problemləri Dövlət Komitəsinin sədrinin müavini Aynur Sofiyeva Azərbaycan Hökumətinin qadın hüquqlarının müdafiəsinə və bərabər imkanların yaradılmasına böyük önəm verildiyini qeyd edib.

BMT-nin Əhali Fondunun Azərbaycan nümayəndəliyinin gender üzrə proqram müşaviri Bəhicə Əliyeva “Qadınlara qarşı ayrı-seçkiliyin ləğv edilməsi üzrə Konvensiyanın” prinsiplərinə qadınların hüquqlarının qorunması naminə riayət edilməsinin vacibliyini qeyd edib.

Azərbaycanın beşinci dövri hesabatı 2015-ci ildə təqdim edilib. Bu hesabatda CEDAW Komitəsi dövlət tərəfindən 2009-cu ildə dördüncü dövri hesabatında verilmiş tövsiyələr nəticəsində qanunvericilik islahatlarının keçirilməsini yüksək qiymətləndirməklə yanaşı, Azərbaycan hökumətinə qadınların hüquqlarının təşviqi məqsədilə bir neçə mühüm addımların atılmasını məsləhət görüb. Bunların arasında doğulanlar arasında oğlan uşaqlarına verilən üstünlüyün aradan qaldırılması istiqamətində qurumlararası Fəaliyyət Planı, Məişət Zorakılığının qarşısının alınmasında milli strateqiya və Milli fəaliyyət planı qəbulu, eləcə də “Qadınlara qarşı zorakılığın və məişət zorakılığının qarşısının alınması və onunla mübarizə haqqında Avropa Şurasının Konvensiyası”nın ratifikasiyası üçün zaman çərçivəsinin müəyyən edilməsi durur.

Bir çox vaxt “Qadınlar Konvensiyası” adlandırılan "Qadınlara qarşı ayrı-seçkiliyin bütün formalarının ləğv edilməsi haqqında" beynəlxalq konvensiya 1979-cu ildə BMT-nin Baş Assambleyası tərəfindən qəbul edilib. Azərbaycan Respublikası 1995-ci ildə həmin konvensiyanı ratifikasiya edərək sözü gedən prosesə qoşulub.

Konvensiyanı ratifikasiya etmiş və ona qoşulmuş ölkələr sənədin müddəalarını yerinə yetirərək gender bərabərliyinə təkcə “de jure” deyil, eləcə də faktiki hər bir kişi və qadın tərəfindən hiss ediləcək dərəcədə nail olmaq hüquqi öhdəliyini qəbul edirlər. Bundan əlavə ölkələr Konvensiyanın ratifikasiyasından bir il sonra ilk milli hesabatlarını, daha sonra növbəti hər dörd il ərzində sazişdən irəli gələn öhdəliklər üzrə görülmüş tədbirlər üzrə hesabat verirlər. Azərbaycan Hökuməti altıncı dövri hesabatı 2019-cu ilin mart ayında təqdim edəcək.